مجاراه بين عزوبي ومتزوج
قال العزوبي يوم شـاف المعاريـس
الرابـح اللـي لاقعـد مايقـومـي
أول سنـة كـلٍ يبـث الاحاسيـس
وثاني سنة تجلب عليـك الهمومـي
وثالث سنة حط الرمل والمتاريـس
لابد مـن حـربٍ تقـوم وتدومـي
لامن دخلـت الـدار لاكنهـا بليـس
متلفلـفٍ فـي غاليـات الهدومـي
تأخذ من المخباة وتسحب من الكيس
وتغيـر الموديـل شـيٍ لـزومـي
وان قلت ما أملك يامره لوهو فليس
قالـت تديّـن لا تكـثـر بلـومـي
ليتك تساعدنـي تصحـح كراريـس
زادوا علينا أربع حصص في العلومي
أزوارة في العصر والصبح تدريـس
والليـل تصحيـحٍ وودي أنـومـي
تبكي إذا جاها وجع لوهو ضريـس
وتقول أبي دكتـور ماهـو حكومـي
يروح عمرك بين عـرسٍ وتأسيـس
واربـع سنيـن والبزاريـن كومـي
وسط المطابخ بين قـز ومحاميـس
هـذا صحـن رزٍ وهـذاك ثـومـي
والا خلصـت إمنظـفٍ الملالـيـس
جتك تقول انهـج نبـي زود لومـي
ولا جبت قالت اكنس الحوش تكنيس
خل البلاط يصيـر مثـل النجومـي
ومكرسٍ جهدك من الخوف تكريـس
وان نادتك بالصوت اقبلـت مومـي
يجيك تـال الليـل دايـم كوابيـس
ويشيبنـك مزعـجـات الحلـومـي
تعيش يالمعرس حيـاة المحابيـس
وشف العزوبي بكل شارع يحومـي
من مفرق جلاجل إلى جوي للخيـس
وان حار حايرهم بوسطـه يعومـي
يفرح إذا شاف الوتـر والمراويـس
وفي كل يـومٍ كاشـتٍ ومعزومـي
شف العزوبي مايعـرف الهواجيـس
ولا يـودي حرمتـه كـل يـومـي
يا عنك ماحاش الفخـر والنواميـس
الا عزوبـيٍ يـعـرف السلـومـي
اذا اعرس المعرس غدا عندنا هيس
ونزيل اسمه مـن سجـل القرومـي
والى بغيـت البهذلـة والدحاويـس
فأعرس وخلك من عـداد الرخومـي
وش صابكم من عرسكم يا المفاليس
وش استفدتوا غيـر دق الخشومـي
ترى عناق العام نطت على التيـس
والحرعقب العـرس يصيـر بومـي
قال العريس :
قال العريس أنا الذي فـي سعـاده
ماني عزوبي ضايق الصدر مهموم
مبسوط من مثلي قعد عنـد غـاده
مهوب مثل اللي لحاله تقـل بـوم
أنا اشهد انه عايـشٍ فـي قـراده
يروح عمـره مـا تهنـى ولايـوم
الى دخـل للبيـت يبلـش بـزاده
يقعد يقطّع له طمـاطٍ معـه ثـوم
ولا قضى عقب العصر من عـداده
والحوض من كثر المواعين مزحوم
والى غسلهـن ثـم فـك السـداده
دلى يغسل لـه سراويـل وهـدوم
وان ماطبـخ روّح لمطعـم حمـاده
والا قعد في منزله واعلن الصـوم
وان جاه ضيفٍ باغـيٍ لـه رفـاده
يروح يشـري رز وايـدام ولحـوم
ما يعرف الشمبو وراسـه عـراده
وشمغه من الكواي مليانـه رقـوم
ما يكنس الفرشـه ويلقـط بـداده
امـا بقايـا رز او خبـز معـروم
عنـده صراصيـرٍ بحاجـه ابـاده
تسرح وتمرح في الغرف دايم الدوم
يجمـع قروشـه ويتسلـف زيـاده
حتى يسافر مصر او ديـرة الـروم
او راح يـم التـاي وتـرك بـلاده
ناظر جوازه ممتلـي كلـه ختـوم
وإلى رجـع يـروح يـم العيـاده
حيث ان فيده من فعايلـه مزكـوم
لـه موتـر خـرده كثيـر فسـاده
في كل يومٍ في الاشارات مصـدوم
غمارتـه تقـول ورشـة حــداده
ومريقده في شنطتـه دوم محـزوم
دوم يتنقـل تقـل كنـه جــراده
في كل يومٍ نازل لـه علـى قـوم
يسهر والى قام الظهر مـن رقـاده
روّح على شغله والى اليوم مخصوم
يذي بنـات النـاس يبغـي مـراده
في كل يومٍ زاهمٍ له على ( هـوم )
اراه مايعـرس ويـقـدح زنــاده
يترك بنات الناس ويصير معصـوم
يلقـى هنـوفٍ تخدمـه مثـل داده
ويصير رجّالٍ ويسلـم مـن اللـوم
يفرح الى من قرب وقـت الـولاده
ويصير معنى العرس بالحيل مفهوم
يشـوف أولاده ومعهـم شـهـاده
قبل الوفاة وقولة النـاس مرحـوم
منقووووووووووووووول
|
العرض العادي
