رديه ذيب العمودي وعواد العلي
مدحنا ناس تستاهل وجربنـا الحيـاه الـوان
ومدحنا ناس ماتسوى قصايـد نـاس تعبانـه
وانا متجاهلٍ طيبك علـي بالسـر والاعـلان
وانا لـولاك بالاعـراب ماحصّـل ولا خانـه
انا مجبور مادام المراجـل شالهـا الطوفـان
اقول اني بدونـك موقعـي مجهـول عنوانـه
انا متعّود اخذ منـك لامنـي مدحـت انسـان
عسى اللي ماقدر يمدح جنابك يقطـع لسانـه
يزودّني شرف مدحٍ يجي في فارس الفرسـان
اخوي اللي شمخ بنيان عـزي فـوق بنيانـه
اخوي اللي بطارف منكبه يفتح لـي البيبـان
اذا شاف الزمن قدام وحهـي صحـك بيبانـه
اخوي اللي ليا دورّت ماحصلـت لـي ديـوان
اجي له كـل حـزه واجـده مفتـوح ديوانـه
اخوي اللي جعل وضحى لغه بلسان ابن عدوان
جعلها رمز مشهـور مثـل خولـه وسفانـه
جعل لي بالغضب حكمه منحني بالرضا ميدان
مسجل بأسمـي الميـدان والميـدان ميدانـه
عطاني من شريفين المبـادي بيعةالرضـوان
علومـي فـي نظرهـم كلهـا دره ومرجانـه
معي دايم يحدثّني ليـا مـن غابـت الخـلان
ولا افضل من حديثه غير ذكـر الله سبحانـه
خليلٍ مايبـور ولا نخيتـه كسـر القضبـان
ولا من طحت يحملني علىصـدره وذرعانـه
خيار الناس له بقلوبهم قـدرٍ كبيـر الشـان
اخوي المعجزه معـروف تقديـره وسلطانـه
ليا منه غضب يخشى غضبه الشيخ والسلطان
سلاطين الدول تحرص على كسبه ورضوانـه
يسافر ماتقيّـد فـي نظـام المـدن والبلـدان
ولا يمكن تحـاول تمنعـه شرطـه وهجانـه
اخوي اللي على دربه تسير وتتعب الاخـوان
خوي اللي تقدرني جميع النـاس مـن شانـه
تبون اسمه نعلمكم وكل انسـان لـه ميـزان
بتكوين القناعه كـل عقـل انسـان ميزانـه
(اخوي الشعر)محمود السجايا وهبةالرحمـان
ولا ينلام مـن يعتـز بالطيّـب مـن اخوانـه
ذيب العمودي
عسى الله يحفظ القائد وانا يكفيني العنـوان
مادام اسمي يسار اسمه يحسبوني من اركانه
قبيلة طي تفخر به ولاهـو بـس للعصـلان
سفير وناطقـآ رسمـي يترجمهـا بقيفانـه
معالي ذيب من شمر وحيد ولامعـاه اعـوان
اذا مثـل قبيلتـنـا يشرفـهـا ولا هـانـه
رهنت لمجدك الماضي شعور الحب والعرفان
اشجع ذيب واحبه وانا واحـد مـن اعوانـه
شهادة حب مجروحه سببها غلظة الشيبـان
وانا ادري نيتة بيضا وقوله مـزح وميانـه
ولكن يحكم الواقع وانا بنطـق واقـول الآن
عساه يسلم الرايه ويجلـس بيـن ورعانـه
تركنا المنهج الرجعي وقولت كان ياما كـان
وانا اول وارثآ شرعي ابي رمحه مع حصانه
مادام انا بشهر الخير وربي داحر الشيطـان
حماية عرشكم واجب مادام النـاس طمعانـه
مدام السن له كلمه يجيلك يـوم ياسرحـان
ويبقى ذيبنـا الاول غـلا شمـر ووجدانـه
ترى البصمات معروفه وبصمة ذيب غير فلان
تميز ذيـب عـن غيـره بكلماتـه والحانـه
خذاله صوله وجوله وحارب حرب والعتبـان
معارك شفرة المعنـى ولاهـي دان دندانـه
ضميره حي مازور ولاانكر عشرة المطـران
اقر ولا انكر الواقع مع انـه كـان بامكانـه
اذا غيره يعسف القاف فهو دكتور بالقيفـان
صمود وهيبه وخوه وصـار الكـل صدقانـه
يشارك لحظة الفرحه وياقف ساعة الاحـزان
خلاصـة تجربـة قائـد بافراحـه واحزانـه
تعلمنا من اسلوبه اصـول البـدع والاتقـان
الا يازيـن اسلوبـه الا يامـروع اتقـانـه
قبل عشرة دنانيرآ ذكرهـا محمـد العثمـان
رواه ورنس واسندها على واحد من اخوانـه
ابختم والعدد ناقص ولاهو عجـز او نسيـان
كذا عـواد متعـود علـى تقديـر شيبانـه
عواد العلي
منقول
|
العرض العادي
