السلام عليكم
هذه قصيدة في مدينتي الغاليه ( الاجـــفر )
كتبتها في حفل مخيم الحيانيه ولم اقدمها لزحمة البرنامج
شرفها انها الان في قوافي مجالس الويبار
تفظلوا :
باكتب قصيده وانشروها بالاعلان
قصيدتي فيها العجب والتعاجيب
باكتب قصيد بديرتي دار الاخوان
نبراس دين وعز ماهي ملاعيب
ومن قبلها باقول منهم هل الشان
اهل الفعول الساميات النواجيب
شمر هلي من نسل عارب وقحطان
شمر سيوفٍ باللقاء واللواليب
شمر ذحاح الماء وشمر شجر بان
وشمر جبالٍ راسياتٍ مصاليب
وان كان بين الناس شرهٍ وشفقان
يلقى بعبده شرهته والمعاصيب
صـــيارمٍ ميزانهــــم دوم ربحــان
ماينقص الميزان كثر المطاليب
وهذي بيــــــوتي قافيتــها على آن
لجل المكان الي يضم الاصاحيب
هدلان ياللي تجهل الوقت هـــــدلان
حضن الحنون الي ترد المعاييب
من حد الابرق لين تقبل على ام شان
ومن الخوير الى العياف المهاضيب
هذي حدود الدار تزهــــــى وتزدان
معالـــمٍ تبقى بـــدون شكٍ ولاريب
داري ترى الاجفر بها احباب واخوان
فخـــر الرجـال الي تعد المواجيب
(وراع المليحا) صار للدار عنوان
هاك الشجاع الي وقف للمصاعيب
شيخٍ تهابه بالمواقيف شجـــعان
كـم شيخٍ ارسل طاعته والمعاتيب
ماعال والله ولاحصل منه نقصان
وقت المكارم ماعرف مثله الطيب
والشيخ ورّث منبع الجود شيخان
بهم ترى مااسمع كثير المكاذيب
وياراكبٍ من عندنا فوق شقران
حرٍ نســل حرٍ ولابـــه عــذاريب
عذروبه انه يقطع البيد شفقان
يشفق على وصل الوفاء والمناديب
بلغ تحيـــه نحمله وســط قيفان
من شاعرٍ شعره حلاة المشاريب
للي لفى به من شبيبه وشيبان
يزهى بهم جمعٍ حصل فيه ترتيب
جمعٍ به (الويبار) طاعوا كحيلان
لجــل الحميه كلهــــم له معازيب
وانا دفعني لجل هالقاف برهان
فيه اذكر شعوري وخلج المحاديب
لاني ربيت اوزن قصيدي بميزان
ميزان شيخٍ راح تحت النواصيب
شيخٍ على الطيبات ضامي وعطشان
وصاني اكمل سيرته مع هل الطيب
وهذا قصيدي ماحصل فيه بهتان
منهو يلومـــن لاكتبتـــه بتوجيـب
لا ما كتبته ارتجــي زين فتـــان
ولاني بوصف ناقشات المخاضيب
شاعر واناشد بالوفاء طير حوران
وابدع طواريقي بحنكه وتهذيب
ولكم سلامي عد همـــــال الامزان
واعداد مايرقى بعـــــال المراقيب
وابي السموحه كان بالقول نقصان
(ويباريٍ) يمشي على جرة الذيب
وصلاة ربي عد مايخلق انســان
على الذي نهجــه بعيدٍ عن الريب
اتمنى ان تحوز على اعجابكم
محبكم نايف الناهي
الاجفــــر "قصيدة"
العرض العادي
