الامــــــــانـــــــه
أمانه أرسلت معي لكايد بن محيبس
أبو شريف الشاعر الذي لايخفى عن الجميع حفظتها وسلمتها إليه (( اللهم إني أوصلتها اللهم فشهد ))
الأمــــــــانـــــــــه
مزلزل رعودها وملبد غيومه * الله اللي جميع الغيب علامه
خالق الجن من نيران محمومه * وخالق الانس طين وكاسي عظامه
مطعم المشركين اشجار زقومه * ويل مدخل لمنهو عابد اصنامه
ومدخل المؤمنين اجنان مشمومه * جنه ماتوصف ريح شمامه
مقدر العمر والوقعات محسومه * كافل الخلق كله مقدر اقسامه
كل امر مثبت في زمن يومه * ميتاخر ليامن اوفت ايامه
كن فيكون بالحرفين محتومه * طويت الصحف بامره وجفت اقلامه
شاعر اقول والافعال معدومه * في كتابك ذكرتن محكم احكامه
كل وادي نجيه ونسلكه هومه * وكل غاوي ورانا زاد بهيامه
الا انا بعضنا قلت مرحومه * الامن رحم ربي ونعم رحامه
ربي النفس دايم غير معصومه * ابعده عن الفجور واحسن إلهامه
يالله انك عملنا تحسن ختومه * العمل طالبك تحسن لي ختامه
وبعد ذلك انقى در منضومه * والقصيده تجي مع عرف نظامه
هيه ياللي تشد شداد علكومه * كنها داب حجرف ترفع الهامه
كن فيل ابرهه اعطاه خرطومه * والمناخر نفيخه غاز لحامه
تاكل الدرب مثل النار وجرومه * تلهب الدرب لامن صار قدامه
كن اذانه حراب الجيش ملمومه * النجابه تشوفه شوف بعظامه
حرة ما تداني تقل منجومه * بس تفلت على الممشى ودرهامه
مثل شيهانه للكف مزهومه * في خدود الفيافي كنها شامه
خايفه من عجتله تقل مهزومه * بالمهمات ما يحتاج دحامه
فوقه اللي شجاع ويفسر هدومه * الخلا ما يهز قلبه وصمامه
بوصلته الجدي ويراقب نجومه * في علوم الفلك ماخذ له إلمامه
غيهبي حان وقته حان ملزومه * الدروب المهمه دوم زحامه
وكل الله مع العصفور وجهومه * وانت اعرفك مع النجمات مجهامه
يا نديبي تشوف الناس ملمومه * في مضيف طبيعي فيه لملامه
بيت كايد محيبس مابها لومه * مثل عملاق تحته تاقف اقزامه
يانديبي تراهو واضح رسومه * المراجل عطته الدرع ووسامه
جلسته في جلوسه كنها قومه * وقومته في قيامه فوقها قامه
نعم منه وكفو ومالك نعومه * شاري الطيب كاش ولاعمر سامه
لحيته عن كثير الغش محشومه * والشنب يانديبي واضح
اكرامه
قرين ساسه مسيس مابه اثلومه * الزمن لايحاول صعب مثلامه
جارهم آمنن لوجته خصومه * سارجين الاصايل ساعه عسامه
قل علي شساق يوم ٍعيقد بقومه * يوم طبل المنايا رج دمامه
سوقة حسين يم الموت وسهومه * يدري الموت من خلفه وقدامه
والبنادق يصير الموت بخشومه * دشها في مقادح نكس اعلامه
ونت ورثت هذولا ولابس هدومه * مثلك يحق له يفخر بهندامه
وانت حر ليامن رجت لك الحومه * السمينه حصصه كان هو حامه
وانت كايد محيبس ترسي عزومه * من سلايل رجال دوم عزامه
وانت سيف ٍ ليامن دك بخصومه * سال دم المنايا ماهي حجامه
وانت مر على اعدا مثل علقومه * مر كالحنظله يا شين مطعامه
وانت حلو لربعك مثل حلقومه * حالي كالعسل والسمنه إيدامه
والشرف صرت أبوه وصرت مخدومه * كايد ٍ والشريف يصير خدامه
ونت ذيب ٍ يحوف وطاير ٍ نومه * ذيب ٍ أحمريرق وشاف غنامه
وانت الأرقط شدوقه موت مسمومه * يلتوي بالضروره ينفك بلامه
يم خوالك تروح وروح لعمومه * بين نعم العروق الخال واعمامه
وانت تطني وتطني بعدها زومه * ودوم كبد الشجاع بمر زوامه
ثم تنهض وتصفن بعدها شومه * وبعدها شيمتن تكرب على حزامه
مع نديبي أمانه لك مضمومه * والأمانه تضايق دوم ضمامه
والمنافق ثلاثه عدة رقومه * يالله إنك تبعدني عن أرقامه
أوله لو تحدت تكذب علومه * وثانيه يخلف الميعاد بأوهامه
وثالثه بالأمانه خانت سلومه * من وجد به حديهن شك بسلامه
ولأمانه شريفه نطت رجومه * طوحت شيلته تنخاك ولثامه
تندبك والجدايل سود ملمومه * تمشطه في هموم البعد وحطامه
في تراب المهانه حيل مدمومه * به تجاعيد هم ودمعه ايتامه
تنتخي فيك عيت تندب رخومه * العشا والسمينه بكف غشامه
جت تنخاك شوفه حيل مضيومه * وين كايد تنادي شوف من ضامه
وحضبوبك أهلها كلهم كومه * الهقاوي عليك تسابق أقدامه
عطهم الدلو عطهم حبل مبرومه * والمواصل حباله أنت برامه
إرشق النفس رحمه طولت صومه * إعتق اللي يشوف الموت بصيامه
الأمانه جلبته ونت لك سومه * جيتها لك لحالك وأنت سوامه
الأمانه تصلي ونت مأمومه * كاتفه تنتظر تسليمه إيمامه
الأمانه وصوله لك ملزومه * بأمر ربي علينا ندي إلزامه
من هنا وتحت فيه حروف ملغومه * ونته أكبر خبير ٍ عارف ألغامه
عين وحده ولابه مي معلومه * وألف يد ٍ بجالي ترفع إبهامه
من يشوفه ضمابه يبس بلعومه * وكل ٍ مناخه قحيط ٍ مادفى خامه
موحشه أرضها تنعق به البومه * من سكن به يلوبد تقل نعامه
حلله يارحبي هات مفهومه * والمعاني تحلل عند فهامه
تم سبكه وحبكه بأمر مرسومه * نسبكه بالذهب ونعاير غرامه
جودته والعلامه لك مبصومه * ابن شنو فهيد خليف ختامه
وختمه بأمر ربي لبد غيومه * الله اللي جميع الغيب علامه
|
العرض العادي
